O conselleiro de Sanidade, Antonio Gómez Caamaño, negou que exista un “colapso” no servizo de radioterapia do Hospital Meixoeiro de Vigo e vinculou os problemas con “momentos de avarías”. “Son unhas máquinas moi sensibles, necesitan moito mantemento e hai momentos que se producen avarías que se poden acumular”, dixo para incidir, ademais, en que coincidiu co tratamento de pacientes de Ourense na área de Vigo por “renovación tecnolóxica” na primeira.

“Hai que incrementar horario e tratar a algúns pacientes no hospital Povisa, cun servizo de radioterapia moderno e adecuado”, aseverou en canto ás solucións. Mentres, cuestionado nunha visita ao Hospital Materno Infantil da Coruña sobre as denuncias de problemas no acceso á Atención Primaria, insistiu en que Sanidade traballa “todos os días para mellorar a sanidade pública galega”. ·”É unha liña estratéxica”, apostilou.