O alcalde de Vigo, Abel Caballero, indicou que o Concello porá en marcha un plan de tráfico para alixeirar o acceso aos colexios da cidade neste inicio de curso, que arrinca a partir do mércores 11 de setembro.
Nun audio difundido aos medios de comunicación, o rexedor dixo que axentes da Policía Local darán atención ás inmediacións dos centros á entrada e á saída dos 36.000 alumnos que cursan os seus estudos na urbe. A intención, segundo subliñou, é facilitar e alixeirar o tráfico, non só dos autobuses escolares, senón tamén dos pais e nais que vaian deixar ou a recoller aos seus fillos.
Por outra banda, Caballero informou de que este luns abriu unha nova escola infantil municipal na Praza da Industria. Cun investimento próximo a un millón de euros, dispón de 82 prazas, aínda que a estas instalacións trasladaranse os pequenos que estaban na escola de Santa Marta. O alcalde aproveitou para volver criticar que a Xunta non financie a gratuidade dos comedores das gardarías.
