O Xardín da Memoria do Cemiterio de Pereiró, en Vigo, acolleu este martes, un ano máis, o acto institucional co que o Concello rende homenaxe a alcaldes, deputados e sindicalistas asasinados “por defender a democracia” en 1936.

O alcalde, Abel Caballero, presidiu este acto, que contou tamén coa presenza de familiares dos homenaxeados: Emilio Martínez Garrido, alcalde de Vigo; José Antela Conde, alcalde de Lavadores; os deputados socialistas Antonio Bilbatúa, Ignacio Seoane e Enrique Heraclio Botana; os sindicalistas Apolinar Torres e Ramón González Brunet; e o concelleiro Ubaldo Gil.

“Hai 88 anos, neste cemiterio asasinaron a demócratas, a persoas que deron a súa vida por vivir en democracia e defender os seus principios, a liberdade e a dignidade”, proclamou Caballero, quen puxo en valor o importante avance da Lei de Memoria Histórica para que feitos como estes non volvan suceder.