The Wild Fest, que chega este fin de semana á súa sexta edición, regresa a Vigo para reivindicar a sustentabilidade e o respecto polo medio ambiente con música, cinema e actividades de lecer na natureza.

Así, ademais dos concertos de 11 bandas das que nove son galegas, o encontro proxectará unha vintena de curtos internacionais de temática ambiental. Haberá tamén talleres, actividades para os máis pequenos e a habitual yinkana de orientación polo monte.

A Delegación Territorial da Xunta de Galicia en Vigo acolleu este martes a presentación deste evento “de pequeno formato”, que se desarolla na contorna natural do parque forestal de San Miguel de Oia do venres 30 de agosto ao domingo 1 de setembro.

PROGRAMACIÓN

O prato forte desta edición chegará o sábado pola noite con Dakidarría e Moura, que compartirán cartel con Julián Maeso e Moonshine Wagon. A Polémica Banda dos Bechuchos e Mad Martin Trío tocan nas sesións vermú do sábado e do domingo, respectivamente.

Ademais, o venres celébrase a segunda edición do concurso Salvaxesons coa participación de Sanny Law, The Kelly Kelly’s, Superglú e The Broke.

No que respecta ao cinema, nesta edición proxectaranse 20 curtos e unha longametraxea repartidos en cinco sesións. Unha das cintas seleccionadas é ‘Iberia, natureza infinita’, candidata a mellor documental nos premios Goya, así como outros títulos exhibidos en destacados certames internacionais como o Wild & Scenic Filme Festival, BANFF, Bilbao Mendi Filme Festival, FICMA, CineEcoSeia ou o Wilscreen.