A Asociación Galega para a Defensa da Sanidade Pública ve un “negocio ruinoso” a colaboración público-privada no sector sanitario e esixiu un plan urxente para blindar o público en Vigo, “que debe pasar polo incremento da contratación de persoal sanitario para a utilización intensiva do Hospital Álvaro Cunqueiro e do Meixoeiro”.
Nun comunicado remitido aos medios de comunicación, a plataforma criticou o argumento de “eficiencia” utilizado pola Xunta para recorrer a este tipo de investimentos, lembrando que no caso do Álvaro Cunqueiro esta colaboración supuxo un “sobrecusto” de 470 millóns de euros.
“Ademais do incremento do negocio das empresas privadas, a Xunta do PP tiña outro obxectivo estratéxico: blindar o concerto con Povisa para a atención sanitaria de 139.000 persoas da área de Vigo. Por iso recortou o proxecto inicial en 400 camas, as mesmas do hospital privado, que recibe 75 millóns de euros públicos cada ano”, engade.
Para a Asociación, a xestión do Executivo autonómico da sanidade é “nefasta”, “xa que mentres cunha man xera un sobre custo de 1.200 millóns en 10 anos na sanidade viguesa, con respecto ao proxecto inicial (custo Cunqueiro e Povisa), coa outra permite a venda de hospitais a fondos de investimento estranxeiros”.
“Estas son as consecuencias da chamada colaboración público-privada na sanidade pública”, lamentou SOS Sanidade Pública, esixindo un plan urxente para Vigo mentres se elabora un plan funcional para ampliar o Cunqueiro “que permita prescindir do concerto singular de Povisa”.
