A Comisión de Transparencia de Galicia estimou a reclamación interposta polo concelleiro do grupo municipal do PP Fernando Abeijón, despois de que o goberno local non facilitase a visualización do expediente relacionado coa xestión do Centro Integral de Inclusión e Emerxencia Social (CIIES) de Marqués de Valterra.

Nun comunicado, os ‘populares’ aseguraron que este órgano adscrito á Valedora do Pobo admitiu a súa queixa e reclamou ao Concello que cumpra a súa obrigación nos próximos días, despois de que o pasado mes de maio xa instase por primeira vez ao goberno municipal a cumprir coa normativa de transparencia.

“Desde o partido Popular de Vigo queremos denunciar un novo obstáculo por parte do goberno de Abel Caballero ao noso labor como oposición. Un máis de tantos que inciden no mesmo, negar a este grupo municipal o acceso á información á que temos dereito para poder exercer o noso labor de control e fiscalización deste executivo local”, denunciou Abeijón.

O concelleiro do PP indicou que a idea é comprobar se a entidade xestora cumpre cos requisitos do prego técnico, así como ter acceso ás queixas e reclamacións rexistradas sobre o funcionamento do servizo e ás actas e requirimentos de inspección. “Trátase dunha ocultación que demostra, unha vez máis, a falta de transparencia deste goberno socialista que reiterada e intencionadamente atrasa ou denega inxustificadamente o acceso a determinada documentación que, por lei, está obrigado a facilitar”, sentenciou.