O portavoz do BNG de Vigo, Xabier Pérez Igrexas, denunciou a aparición de pintadas fascistas e de exaltación do nazismo no Lugar da Memoria do Monte de O Castro da cidade, polo que pediu ao Concello que proceda á súa limpeza.

Con frases como ‘Vermellos non’ e símbolos nazis, o vandalismo cubriu distintos elementos de O Castro, onde o réxime franquista fusilou a 136 persoas, segundo lembra Pérez Igrexas. O nacionalista lamentou o “preocupante avance do discurso de odio” e pediu ao alcalde, Abel Caballero, a retirada “de inmediato” destas pintadas.

Tamén solicitou ao rexedor que elimine todos os símbolos fascistas e franquistas que continúan presentes en distintos puntos de Vigo, empezando pola Cruz dos Caídos tamén en O Castro.