A Xunta de Galicia avanza nas obras do novo centro de saúde Olimpia Valencia de Vigo, que se situará no antigo edificio da Audiencia Provincial da rúa Lalín e que suporá un “cambio de paradigma” e unha sanidade máis “empática”.

Así o sinalaron os conselleiros de Sanidade e de Vivenda e Planificación de Infraestruturas, Antonio Gómez Caamaño e María Martínez Allegue, respectivamente, nunha visita levada a cabo este venres. Alí, ambos puxeron en valor o “cambio de paradigma” que implicarán estas novas instalacións, ao unir nun mesmo centro o servizo de urxencias, así como a atención primaria e especialidades.

Ademais, segundo Gómez Caamaño, tratará de proporcionar aos usuarios e aos traballadores espazos máis humanizados, con máis funcionalidade e prestacións, que se encaixan na estratexia da súa Consellería de proporcionar un dispositivo sanitario “empático”, eficiente co medioambiente e amable coas persoas.

Martínez Allegue centrouse en destacar a importancia da rehabilitación do edificio, para darlle unha nova vida a unha construción que quedou en desuso tras trasladar á Cidade da Xustiza os xulgados de Vigo (que agora ocupan á súa vez as instalacións do antigo Hospital Xeral).