A fábrica viguesa do grupo automobilístico Stellantis volverá parar parte da súa produción durante a quenda de noite deste xoves, día 13, e na quenda de mañá do venres por falta de pezas. En concreto, segundo informou a empresa aos traballadores, será o Sistema 1, onde se ensambla o Peugeot 2008, o que permanecerá sen actividade durante dúas quendas.
“Por causa de forza maior, debido a dificultades de aprovisionamento, suspéndese a actividade do Sistema 1 nas quendas de noite do xoves 13 de xuño e de mañá do venres 14”, indicou a compañía. Desta maneira, unha vez máis Stellantis Vigo vese obrigada a parar por problemas loxísticos. No que vai de ano, a compañía tivo que deter as súas liñas e produción en incontables ocasións por falta de pezas, do mesmo xeito que xa vén ocorrendo nos últimos anos.
