A Deputación de Pontevedra aprobou este venres en Xunta de Goberno o convenio co Concello de Vigo para a reforma da bancada de Gol do Estadio de Balaídos.

En rolda de prensa, o presidente da Deputación, Luís López, informou que a administración provincial achegará “máis de 13 millóns de euros, é dicir, o 50% da obra” para que “o celtismo goce dun estadio de primeira para os próximos cen anos”.

“Hoxe é un día importante para Vigo, para a provincia e para o celtismo”, manifestou ante os medios o presidente provincial. López destacou que eses 13 millóns de euros que achega o organismo provincial para a reforma do Estadio Municipal “son o maior investimento que realizará a Deputación en Vigo, son un impulso millonario para que Balaídos sexa un estadio de primeira” e son tamén, engadiu, “outra mostra máis de que cumprimos a nosa palabra”.

Agora queda pendente a celebración do acto de firma pública do convenio, que se fará no propio estadio “co Concello e coa presenza do Celta”. Neste sentido, Luís López insistiu en que están “a disposición” do consistorio para que o proceso de licitación e execución “prodúzase da maneira máis áxil e máis rigorosa posible”, tendo en conta que hai “antecedentes de atrasos e sobrecustos nas obras do estadio”.