O goberno municipal de Vigo acusou ao PP de “mentir deliberadamente” sobre a cobertura de prazas de funcionarios públicos no Concello, e admitiu que hai un “número substancial de vacantes” cubertas de forma interina, aínda que atribuíu esa circunstancia á chamada “lei Montoro”, que impuña unha taxa de reposición cero para esas prazas.
Así o trasladou, nunhas declaracións remitidas aos medios, a concelleira de Xestión Municipal, Patricia Rodríguez Calviño, que subliñou que “é totalmente falso” o afirmado pola edila do PP Patricia García, acerca de que o goberno non cubriu 337 prazas en 2023 por falta de dotación orzamentaria (segundo o interventor municipal).
Segundo a concelleira socialista, “a totalidade de postos teñen dotación orzamentaria, como obriga a Lei de Emprego Público de Galicia” e as vacantes “están cubertas interinamente da forma en que habilita a lei”. Esas prazas, engadiu, serán cubertas de forma definitiva cando se resolvan as ofertas públicas de emprego “que están en marcha”.
Rodríguez Calviño instou á edila do PP a “traballar un pouco para non confundir á cidadanía” e expresou que “sorprende que non saiba que o Concello ten un número substancial de vacantes pola lei Montoro, do goberno de Mariano Rajoy”.
Así, engadiu que “case 5 anos de taxa de reposición cero” tiveron como resultado que non se puidesen cubrir vacantes por xubilación ou outros motivos. Unha situación que, recalcou, “está a corrixirse co actual goberno de Pedro Sánchez”. Finalmente, sinalou que o Concello irá repondo esas prazas “ano a ano” incorporando o persoal para cubrir esas prazas.
