A Dirección Xeral de Patrimonio Natural multou con 98.500 euros á Comunidade de Montes de Cabral por unhas obras executadas preto do nacemento do río Lagares, e que causaron danos no hábitat.

As obras foron denunciadas pola Asociación de Veciños e Empresarios de Cabral (Aveeca) o pasado mes de outubro e o Seprona da Garda Civil tamén puxera os feitos en coñecemento da Xunta. Así, abriuse un expediente relativo ao proxecto dos comuneiros de “obras de recuperación de terreo, construción de muros de contención cun novo paso, mellora de presa e ampliación de paso existente no Aero Club de Vigo”.

Augas de Galicia advertiu de que o devandito proxecto “obvia as afeccións sobre o patrimonio natural” e, avanzados os traballos, o Seprona confirmou que se trataba de “obras moi agresivas” sobre o río, augas arriba da zona da Lagoa de Mol, onde se solicitaba a autorización. Así mesmo, a Garda Civil confirmou que se desviou a canle do río cunha máquina escavadora e que se arrincaron numerosos pés de árbores de ribeira, nun tramo duns 250 metros.

O pasado 25 de marzo, o servizo de Patrimonio Natural de Pontevedra emitiu un informe sobre estes feitos, facendo constar o grao de afección sobre o medio natural, e apuntando que se afectaban os hábitats de varias especies, algunhas delas incluídas no Catálogo Galego de Especies Ameazadas. “En consecuencia, resultou evidente e constatada a destrución e alteración do hábitat das especies incluídas no catálogo galego de especies ameazadas”, sinala Patrimonio Natural, que indica que se trata dunha infracción “grave”.

Así, acordouse iniciar o procedemento sancionador contra a Comunidade de Montes e fixouse a contía da multa en 98.500 euros. Tamén se dá un prazo improrrogable de 3 meses para restaurar a zona ao seu estado anterior.