Un home, que foi xulgado este martes na sala do Penal 2 de Vigo, enfróntase a 2 anos de prisión por un delito de abuso sexual, por uns supostos tocamentos a unha muller nun coche que se atopaba nun aparcadoiro en Redondela. Segundo o escrito de acusación pública, os feitos ocorreron á primeira hora da mañá do 12 de setembro de 2021, cando o procesado se atopaba no interior do seu coche, estacionado nunha zona de aparcadoiro de Redondela. O acusado estaba en compañía da vítima, que estaba a durmir ao seu lado, no vehículo, en bragas e camiseta, sobre un colchón colocado na parte de atrás.
A Fiscalía sinala que o procesado, “con ánimo libidinoso”, puxo a súa man sobre a pube da muller, que reaccionou virándose e dándolle as costas. Momentos despois, o home insistiu e volveu tocala nas súas partes íntimas, apartando as bragas e fregándolle o clítoris. A muller espertouse e, sen ser capaz de reaccionar, quedou quieta cos ollos pechados, ata que uns minutos despois abriunos e virouse, para pór fin aos tocamentos. Como consecuencia da conduta do acusado, a muller sufriu un trastorno de tensión aguda con síntomas ansiosos, e outros problemas polos que tivo que estar a tratamento psicolóxico.
Por estes feitos, a Fiscalía atribúe ao home un delito de abuso sexual e pide que sexa condenado a dous anos de cárcere, e que se lle inhabilite para calquera profesión ou actividade que leve contacto con menores durante 4 anos. En concepto de responsabilidade civil, pide que pague á vítima 5.000 euros por danos morais.
ABUSO A MENOR
Por outra banda, este martes a sección quinta de Audiencia Provincia de Pontevedra, con sede en Vigo, celebrou un xuízo a porta pechada contra un home acusado dun delito de abuso sexual con penetración cometido sobre unha menor de idade. Os feitos ocorreron en xuño de 2022, na residencia do acusado, e a Fiscalía pedía inicialmente para el 9 anos de cárcere, ademais da prohibición de comunicarse ou achegarse á vítima durante 10 anos. Finalmente, o Ministerio Público rebaixou a súa petición de pena a 3 anos de prisión, ao retirar a cualificación do delito con penetración. Pola súa banda, a defensa solicitou a libre absolución.
