A conselleira de Vivenda e Planificación de Infraestruturas, María Martínez Allegue, avanzou que a intención do Executivo autonómico é que as primeiras 201 vivendas de promoción pública da Xunta no barrio vigués de Navia empecen a construírse no verán.
Así o transmitiu durante a súa visita ao novo aparcadoiro disuasorio de Moaña, onde, a preguntas dos medios, ratificou que a Xunta prevé empezar a construír os inmobles. O Goberno galego concretara a súa intención de promover ata 1.600 vivendas nalgún réxime de protección no barrio vigués de Navia. Delas, as primeiras 201 estarán destinadas en exclusiva ao aluguer.
“Os prazos de construción dun residencial colectivo sabemos que son os que son. E despois tamén está a necesidade das oportunas licenzas administrativas, pero estamos agora urbanizando o polígono 1 e contamos con licitar a urbanización do polígono 2 o máis pronto posible, a condición de que o Concello colabore”, detallou a conselleira este xoves.
“Temos que ir da man, evidentemente”, engadiu, antes de incidir en que a tramitación do primeiro proxecto de urbanización co Concello “non foi todo o áxil que tiña que ser”. “Pero esperamos que isto cambie a partir de agora. As primeiras 200 vivendas iniciarémolas neste verán”, resolveu. Finalmente, sobre a PXOM de Vigo, a conselleira lembrou que os informes que dependen da Xunta están “todos emitidos” e que faltan dous que dependen do Estado.
