A vacina española da tuberculose, chamada MTBVAC, inicia estudos clínicos en adultos en India, o país máis poboado do mundo e o de maior incidencia desta enfermidade infecciosa. O estudo está liderado polo goberno indio a través de Indian Council of Medical Research (ICMR) e pola compañía privada Bharat Biotech baixo a tutela de biofarmacéutica galega Biofabri.
En concreto, trátase da primeira vacina viva atenuada de Mycobacterium tuberculose illada dun humano, segundo informa o Grupo Zendal nun comunicado. Este ensaio continuado está dirixido a avaliar seguridade, reactoxenicidade e eficacia da vacina en adultos sans a partir de 18 anos. Este domingo, 24 de marzo, conmemórase o Día Mundial da Tuberculose, que causa anualmente máis de 1,6 millóns de mortes.
A porriñesa Biofabri lembra que a única vacina hoxe en uso, BCG (Bacilo de Calmette e Guérin), consiste nunha variante atenuada do patóxeno da tuberculose en vacas. “Ten máis de cen anos e un efecto moi limitado en tuberculose pulmonar, responsable da transmisión da enfermidade, de aí a necesidade de avanzar nesta nova vacina que suporá un fito na vacunoloxía mundial e que é un exemplo de colaboración público-privada, nacional e internacional”, indica.
“UN PASO DE XIGANTE”
“É un paso de xigante probar en adultos e adolescentes no país no que se acumula o 28% dos casos de tuberculoses a nivel mundial”, asegura o CEO de Biofabri, Esteban Rodríguez. Asegura que se necesita un maior esforzo e financiamento para combater a tuberculose, que segue sendo unha das principais causas de morte infecciosa no mundo.
Pola súa banda, o profesor Carlos Martín, investigador principal do proxecto Vacina Tuberculose, da Universidade de Zaragoza, subliñou: “A cooperación internación é esencial para lograr unha vacina eficaz contra as formas respiratorias da enfermidade, responsable da transmisión respiratoria e se MTBVAC mostra a súa eficacia en países endémicos, pode ser unha ferramenta crave para o control da tuberculose a nivel mundial”.
ENSAIOS
Ata chegar aos estudos clínicos en India, a vacina pasou pola chamada fase 3, en neonatos, que está a ser avaliada nun ensaio clínico dobre cego, controlado e comparado coa actual vacina BCG. Nesta fase, serán vacinados 7.000 recén nacidos de Sudáfrica, 60 de Madagascar e 60 de Senegal. Actualmente, xa se vacinaron máis de 1.900 bebés.
O obxectivo é avaliar a inmunoxenicidade e a eficacia de MTBVAC administrada por vía intradérmica a nenos nos seus primeiros días de vida.
Outro fito importante nesta vacina é o desenvolvemento da fase 2 de ensaios clínicos en adultos con VIH, un estudo crave para determinar se MTBVAC é segura nesta poboación e podería ser útil neste colectivo, dado que a tuberculose é unha das primeiras causas de morte. Está en marcha en 16 centros de Sudáfrica, que contempla a vacinación de 276 adultos
