Carlos López Font, portavoz do goberno municipal vigués, acusa a Feijóo de ser cómplice do alcalde de Vilanova, que chamou “chacha” á presidenta da Deputación de Pontevedra, Carmela Silva.

O presidente da Xunta si recoñeceu que as palabras de Gonzalo Durán non foron acertadas pero non aceptou cesalo, a pesar dos desexos socialistas tralo estalido da polémica. “Non admito leccións do concello máis bronco de Galicia”, advertiu Feijóo.

Font acusa ao presidente da Xunta de “avalar insultos machistas” a Carmela Silva, que segundo o goberno vigués foi atacada e insultada “só polo feito de ser muller”. O asunto non quedará aquí, posto que a Deputación de Pontevedra presentará unha denuncia aos “ataques machistas, inxurias, calumnias e posible incitación ao odio” das declaracións de Durán, alcalde de Vilanova de Arousa, que desprezou a Silva como a “chacha para todo” de Caballero.

Para o goberno socialista trátase dun “ataque á dignidade de tódalas mulleres”, e asegurou que Silva “non volverá a refererirse a este señor”. Cualificou as palabras de Durán como “linguaxe bélica”, “ataque machista, clasista e fascista”.

Tamén dixo López Font da secretaria de Igualdade da Xunta, López Abella, que se non rexeita publicamente estas palabras “quedará inhabilitada para exercer a función que lle corresponde, que é a de representar ás mulleres na administración autonómica”.

“Empézase insultando á muller, sendo peiorativo con ela, e continúase coa violencia de xénero e matándoa”, asegurou Font, que advertiu neste tipo de descualificacións “a orixe da violencia machista”, e engadiu que “o que non se manifesta en contra é cómplice”.

Non é a primeira vez que a presidenta da Deputación de Pontevedra é insultada, segundo Font pola súa “condición de muller”: o concelleiro do PP en Moraña Jorge Caldas chamouna nunha ocasión “lercha” e “mala raposa”.

Feijóo, pola súa banda, di que despois das “barbaridades” que escoitou este martes no Debate sobre o Estado da Autonomía “ninguén está en condicións de dar leccións”, e menos, o que para Feijóo é o Concello máis “bronco” de Galicia, Vigo, o que segundo o presidente da Xunta ten “a descualificación e a falta de respecto coa forma de actuar, sobre todo coa portavoz da oposición”, é dicir, Elena Muñoz.