Un incendio nunha nave no municipio de Salceda de Caselas calcinou dúas máquinas e un coche na mañá deste venres. Neste sentido, o 112 Galicia informa de que “a rápida actuación dos servizos de extinción evitou que os danos materiais fosen maiores neste incendio”.
Sobre as 10.15 horas, o 112 Galicia tivo constancia dunha nave que estaba a arder no lugar de Montecelo, na parroquia de San Xurxo de Salceda. Foi a través da chamada dun particular, que alertaba sobre a presenza de elementos como bombonas ou botes de pintura. O lume, que comezou nun vehículo, parecía descontrolarse e propagouse por outros puntos das instalacións.
Os Bombeiros do Baixo Miño fixéronse cargo das tarefas de extinción. Controlaron o incendio rapidamente e comunicaron que, ademais dos elementos que arderon, o teito viuse afectado pola calor. Tamén colaboraron o persoal do 061 de modo preventivo, os axentes da Policía Local e os membros da Agrupación de Voluntarios de Protección Civil de Salceda de Caselas.
