O PP de Vigo alertou dos “continuos sobrecustos” das obras municipais no Concello olívico, tras detectar un “desfasamento” do 25% na recente reforma da Praza Elíptica.

Segundo os ‘populares’, esta humanización é a última en sumarse a unha “longa listaxe” de revisións de prezos sobre as que o PP leva tempo pondo a lupa.

O edil Fernando G. Abeijón cualificou esta situación de “escándalo”, lamentando que o modificado do proxecto desta praza non se publicou na plataforma pública de contratación ata esta semana.

“E, por se isto fose pouco, foi aprobado ás ocultas nunha xunta de goberno local extraordinaria e urxente convocada para o mediodía da última xornada hábil de 2022”, engadiu.

“Estamos ante o enésimo sobrecusto deste goberno socialista. O ascensor Halo, cada bancada que se reforma no estadio de Balaídos, o túnel da Porta do Sol, os accesos a Vialia… As arcas municipais afrontan continuamente revisións de orzamento á alza, que adoitan ir acompañadas de incumprimentos nos prazos de execución”, insistiu o concelleiro.