O Servizo Galego de Saúde (Sergas) investiu máis de 234.000 euros en 91 novas camas para a unidade de psiquiatría do Hospital Álvaro Cunqueiro de Vigo, segundo publica o Diario Oficial da Unión Europea este mércores. Tal como explicou a Xunta nun comunicado, a maioría destas camas substituirán o parque antigo desta unidade, mentres que outras se destinarán á unidade Infanto-Xuvenil de psiquiatría, recentemente inaugurada no devandito centro hospitalario.
A selección destas novas camas baseouse nunha combinación de seguridade e confort para o paciente, con especial incidencia na altura mínima do plano para prever danos producidos por caídas en persoas medicadas con fármacos que poden inducir á inestabilidade motora e do equilibrio ou para favorecer a autonomía naquelas con problemas de mobilidade.
