Xuventudes Socialistas de Vigo pediron este venres ante a Delegación da Xunta na cidade unha mellora nos descontos do Carné Xove e un aumento de idade ata os 30 anos da Tarxeta Xente Nova. Así, preto dunha ducia de persoas protestaron ante o devandito edificio administrativo, criticando tamén os “problemas” do transporte público interurbano de Galicia, polos seus “atrasos” e a eliminación de liñas.
O secretario xeral desta asociación en Vigo, Alberto Ledo, reivindicou que mentres o presidente autonómico, Alfonso Rueda, anuncia a gratuidade do bus interurbano para maiores de 65 anos, “moitos estudantes teñen que renunciar a ir a clase por non poder pagar todos os días as viaxes ao estar limitada a gratuidade ata os 21 anos”.
“Xa basta que mentres miles de persoas quedan tiradas nas paradas de bus, Rueda dedícase a percorrer toda Galicia nun bus onde lle pide a Papá Noel que traia ese autobús máxico que solucione todos os problemas actuais”, criticou o secretario xeral nacional das Xuventudes Socialistas de Galicia, Xurxo Doval.
Á concentración tamén asistiu a deputada autonómica Leticia Galego, quen lembrou que no orzamento de 2022 quedaron 45 millóns de euros sen executar en vivenda para que os mozos teñan a posibilidade de emanciparse, ademais dun transporte público interurbano “ineficiente que lles impide a mobilidade por todo o país”.
