A Federación de Empresarios de salas de Festa, Baile e Discotecas de Galicia (FESDIGA) alertou un ano máis dos riscos da celebración de festas e eventos do Nadal ilegais, e presentou un escrito ante o Concello de Vigo para reclamar a posta en marcha dun Plan específico para controlar esas posibles convocatorias e garantir a seguridade das persoas. O presidente de Fesdiga, Samuel Posada, lembrou que moitos establecementos e colectivos organizan festas e espectáculos “non permitidos” no marco das súas licenzas de actividade, “o que representa un grave perigo para os clientes” e supón “unha clara competencia desleal”.
Posada denunciou que moitos dos locais que organizan as festas non tramitan a preceptiva autorización municipal, “nin cumpren os requisitos de seguridade, sanitarios e técnicos obrigatorios”. Así mesmo, lembrou que esas condicións son, entre outras, dispor de licenza de apertura ou declaración responsable, memoria detallada da actividade organizada e os seus horarios, plan de emerxencia e autoprotección (que recolla as características de seguridade do recinto, aforamento, vixilancia, hixiene, saídas, protección contra incendios, etc.), ou póliza de seguro.
Fesdiga apuntou que o Concello é responsable de facer cumprir a normativa nestes casos, e de impedir a realización de festas ilegais, que non teñen autorización e “representan un perigo para os asistentes”. Respecto diso, sinalou que debe ser a administración municipal a encargada de inspeccionar os locais onde se van a facer as festas, comprobar que teñen licenza de apertura e que cumpren todos os requisitos; “pola contra, se durante a celebración ocorre unha traxedia, a responsabilidade recaerá sobre o Concello”.
Por todo iso, instaron ao goberno local a implementar un “plan de seguridade do Nadal”, vixente ata o 6 de xaneiro, que inclúa medidas de coordinación de Policía Local con outros corpos de seguridade, e aumento de efectivos para o control e, no seu caso, sanción de locais que incumpran a normativa.
