O presidente da Deputación de Pontevedra, Luís López, presentou este xoves o novo programa ‘Ponte a Zero’, que ten como obxectivo fomentar a compostaxe e a separación de residuos en toda a provincia.
Foi durante unha visita ao CEIP Serra-Vincios de Gondomar, onde o mandatario provincial explicou ao alumnado e ao profesorado as liñas mestras deste proxecto de educación ambiental que centrará a súa actividade, con charlas, iniciativas, talleres e formación nos centros educativos da provincia e que conta cun investimento por parte da Deputación de 150.000 euros.
O obxectivo desta iniciativa é mellorar os datos de compostaxe, reciclaxe e recollida selectiva do lixo no territorio pontevedrés. A provincia sitúase seis puntos por detrás da media galega en canto a reciclaxe, polo que a Deputación considera que é necesario concienciar á poboación local para que entenda a necesidade de separar correctamente os residuos para reducir os custos de recollida e tratamento e cumprir cos obxectivos marcados pola Unión Europea en materia de xestión de residuos.
Durante a visita, o presidente comentou cos estudantes de Educación primaria deste centro de Gondomar aspectos relacionados coa compostaxe e adiantoulles as actividades que realizarán ao longo do curso académico ao amparo deste programa. Tamén participou no taller organizado nunha clase do centro educativo para dar a coñecer e divulgar o programa que contará con charlas para explicar que facer cos residuos, con xogos para descubrir como reducir a contaminación, coa creación de hortas escolares e con numerosos experimentos para dar a coñecer como funciona un compostero.
DEPORTISTA
Ese mesmo xoves, Luís López recibiu no seu despacho do Pazo Provincial á promesa da xornada rítmica de Pontevedra Lola Ferro, nacida en 2010 e pertencente ao Club Treboada.
A pesar da súa mocidade, está considerada unha das principais promesas desta disciplina en España, destacando pola súa plasticidade na práctica deste deporte, do que xa é subcampioa galega. Forma parte tamén do Plan Nacional de Captación de Talentos.
