A asociación de consumidores Facua acusou á aerolínea Air Nostrum de “ocultar” as compensacións económicas que poden percibir os afectados que quedaron en terra no aeroporto de Vigo despois de que a compañía decidise ceder o avión á expedición do Sevilla FC que viaxara á cidade olívica para xogar contra o Celta.
Nun comunicado emitido este venres, Facua afirmou que a aerolínea enviou un correo electrónico aos afectados polo ocorrido o pasado sábado 4 de novembro no que “non detalla” as cantidades que poden reclamar, que ascende a 250 euros como establecen as normas europeas sobre compensación e asistencia aos pasaxeiros aéreos en caso de denegación de embarque e cancelación ou gran atraso.
A asociación lembra que o artigo 14 desta lei comunitaria establece que a aerolínea que denegue o embarque ou cancele un voo “deberá proporcionar a cada un dos pasaxeiros afectados un impreso no que se indiquen as normas en materia de compensación e asistencia con arranxo ao presente regulamento”. Facua sostén que varios pasaxeiros lle trasladaron que non recibiron tal impreso nin información sobre os seus dereitos e que unicamente se lles indicou que tiñan a posibilidade de pór unha folla de reclamacións.
Deste xeito, a entidade de consumidores sentenciou que Air Nostrum debería abonar as compensacións “de maneira automática” a todos os afectados “sen necesidade de que as soliciten” e “con independencia de que reclamen ou non outras cantidades polos gastos que sufriron e outros prexuízos causados”.
