A Universidade de Vigo (UVigo) liderará tres proxectos da nova convocatoria do programa Poctep, unha iniciativa de cooperación transfronteiriza dentro da Interreg V España-Portugal, que contarán cun orzamento duns 800.000 euros. En concreto, estes tres proxectos estarán centrados no sector aeroespacial, nos incendios forestais e na biofabricación de órganos, segundo se recolle no Diario da Universidade de Vigo (DUVI).
Ademais, o centro participará como socio noutros nove proxectos, o que se traduce nunha taxa de éxito do 37,5 %, xa que das 32 propostas presentadas foron aprobadas 12. Para a vicerreitora de Investigación, Transferencia e Innovación, Belén Rubio, esta é unha “gran satisfacción”, xa que este ano foi o que máis número de proxectos presentáronse a esta convocatoria.
Sobre os tres que coordinará a UVigo, Rubio destacou AeroGanp, centrado no ámbito aeroespacial, porque “mostra a influencia e o potencial da creación do Instituto de Física e Ciencias Aeroespaciais e a relevancia deste novo instituto para a transferencia de coñecemento neste sector na eurorrexión“. Pola súa banda, Iberos+ está relacionado coa biofabricación e o papel para o envellecemento saudable, mentres que Firepoctep+ estará centrado na resposta ante os incendios forestais, “moi importante especialmente nestes momentos de cambio climático”.
