O presidente da Xunta, Alfonso Rueda, participou este mércores no acto de inicio das obras do apartadero ferroviario da Plataforma Loxística de Salvaterra-As Neves (Plisan), no que confirmou que, no mes de novembro, aprobarase a ampliación nun millón de metros cadrados deste complexo loxístico e empresarial, impulsado pola administración autonómica, o Consorcio da Zona Franca e o Porto de Vigo.
Na súa intervención, o titular do Executivo galego sinalou que, coa próxima aprobación desta ampliación, culminarase un proceso “xa iniciado hai bastantes meses” para dar a cualificación de chan industrial a unha área dun millón de metros cadrados, que se incorporará á Plisan. Deste xeito, a Plataforma contará con máis de catro millóns de metros cadrados de chan dispoñible.
Alfonso Rueda tamén se referiu ao comezo das obras do apartadero ferroviario, que permitirá que a Plisan conte con esa conexión en 2025. “Isto era unha necesidade, o Porto de Vigo necesitaba crecer dunha maneira que resultase atractiva e convincente para todos os que necesitan expandirse, e por tanto necesitan este ‘porto seco'”, recalcou o presidente.
