O presidente da Xunta de Galicia, Alfonso Rueda, pediu ao goberno de Vigo que se dea conta de que “a confrontación non vale de nada” e que hai que “traballar conxuntamente” para dar unha “solución rápida e eficaz” ás familias afectadas no incendio do edificio de rúa Alfonso X O Sabio, no que faleceron catro persoas.

Así se manifestou o titular do goberno autonómico en declaracións aos medios de comunicación, tras participar nun acto na cidade olívica, onde dixo que tras esta “traxedia” é necesario facer dúas cousas: investigar que pasou e buscar unha solución para os afectados.

Segundo el, hai que tratar de pescudar se había avisos previos do que naquel inmoble sucedía, se se podería evitar ou quen puido ser o responsable de non tomar as medidas necesarias, co obxectivo de que “non suceda nunca máis”.

Ademais, Rueda subliñou a importancia de axudar ás persoas damnificadas. “E creo que iso temos que facelo todas as administracións. Todas temos responsabilidade, competencias e posibilidades e por tanto o normal e o que temos que facer para ser rápidos e eficaces é traballar conxuntamente”, reivindicou.

Neste sentido, destacou que o Executivo autonómico propuxo ao Concello un encontro para buscar solucións de vivenda e de carácter social ás vítimas do incendio. E animou a outras administracións a que tamén se unan na procura de solucións.

“Cada administración, Concello e Xunta, temos que ver o que nos toca facer e facelo conxuntamente. Espero que o goberno de Vigo se dea conta de que a confrontación non vale de nada. Aquí deberiamos dar exemplo de actuación coordinada cada un na esfera da súa responsabilidade”, sentenciou Alfonso Rueda.