O Pleno do Concello de Vigo aprobou este luns dúas modificacións de créditos para afrontar o pago de axudas extraordinarias para libros de texto, e para sufragar o sobrecusto das obras do ascensor HALO, que une a zona de García Barbón e Serafín Avendaño co complexo Vialia de Urzáiz.
En canto ás axudas para libros, o crédito extraordinario é de 5,8 millóns de euros, e o concelleiro de Facenda, Jaime Aneiros, defendeu que se trata dunha medida “social”, para axudar ás familias, do que se beneficiarán 28.500 persoas.
Na súa intervención, contrapuxo a actuación municipal con estas axudas, ás que se suman as bolsas ordinarias municipais de libros e comedor, coa actuación da Xunta do PP, que eliminou a gratuidade dos libros de texto que implantara o bipartito.
O portavoz do BNG, Xabier Pérez, afeou o “populismo fiscal” do goberno local, que aplica esta medida seguindo o modelo do “cheque Ayuso”, sen ter en conta a renda das familias.
Mentres, o concelleiro do PP, Miguel Martín, trasladou o apoio do seu grupo a estas axudas extraordinarias, aínda que criticou a forma en que foron xestionadas polo executivo municipal, á vez que defendeu que a Xunta ten convocatorias de axudas cada ano para libros e material escolar, en función da renda.
A proposta foi aprobada cos votos favorables do PSOE e o PP, e o voto contrario do BNG, que presentou unha emenda para garantir a progresividade das axudas, pero foi rexeitada.
SOBRECUSTO DAS OBRAS DO HALO
Por outra banda, o Pleno tamén aprobou, cos votos a favor do grupo de goberno e o ‘non’ de PP e BNG, unha modificación de crédito de 2 millóns de euros para sufragar parte do sobrecusto do ascensor HALO.
A finais de xuño pasado, a Xunta de Goberno aprobou a modificación do proxecto da obra, por valor de 3,2 millóns de euros, e que supuña ampliar o prazo en 5 meses, fixando a finalización dos traballos para marzo de 2024.
Nese momento, acordouse abonar o sobrecusto en dúas anualidades, con cargo aos orzamentos de 2023 (1,2 millóns) e 2024 (2 millóns), respectivamente. Pero a UTE que se encarga dos traballos comunicou ao Concello que o prazo de finalización pode adiantarse ata finais de 2023.
Deste xeito, e constatado que non hai orzamento dispoñible para a segunda anualidade nas contas de 2023, o goberno municipal acordou tramitar esa modificación de crédito, por algo máis de 2 millóns de euros, con cargo aos remanentes.
“OBRA EMBLEMÁTICA”
O concelleiro de Facenda, Jaime Aneiros, defendeu esta modificación de crédito para finalizar unha “obra emblemática” que dará servizo a 40.000 veciños da zona, e explicou que o sobrecusto está xustificado polo incremento do prezo dos materiais e por melloras introducidas no proxecto.
Así mesmo, sinalou que a Xunta tamén incorreu en sobrecustos en 55 obras, entre os que sinalou a Cidade da Xustiza de Vigo, cun incremento do 30 % sobre o investimento inicial prevista.
A portavoz do PP no Concello, Marta Fernández-Tapias, denunciou que o goberno local asumise os sobrecustos nesa obra “sen inmutarse” nin “dar explicacións aos cidadáns”, e lembrou que o orzamento inicial anunciado polo goberno local era de 7,2 millóns.
Mentres, o portavoz do BNG, Xabier Pérez Igrexas, subliñou que o sobrecusto no “ascensor de Star Trek” chegou ao 120 %, e reclamou, sen éxito, que se aprobase destinar o mesmo gasto de 2 millóns, xunto a outros 10 millóns máis, para investir en barrios e parroquias de Vigo.
