A Garda Civil de Pontevedra investiga a tres persoas de Barcelona, unha muller e dous homes, pola súa presunta implicación nun delito de estafa a unha veciña de Moaña, á que enganaron mediante o ‘timo do amor’, así como por un suposto delito de branqueo de capital. Segundo informaron fontes da Comandancia, a investigación, a cargo do equipo de especialistas en delitos tecnolóxicos, comezou en xaneiro pasado, cando a vítima, unha muller de mediana idade, presentou denuncia.

Así, esta muller coñecera a través dunha rede social a un home que se facía pasar por estadounidense, de profesión militar e que, co paso dos días, fíxolle crer que estaba interesado en manter unha relación afectiva, gañándose a súa confianza. Co paso do tempo, foi utilizando diferentes pretextos para pedirlle axuda económica e a muller formalizou varias transferencias bancarias, por un importe total de 18.700 euros, aínda que se puido conseguir a retrocesión da última operación, de 2.000 euros, tras decatarse do engano.

A Garda Civil realizou unha minuciosa investigación, estudando ata catro contas bancarias utilizadas para a recepción do diñeiro estafado, e ademais co uso de identidades falsas. Finalmente, púidose chegar aos tres investigados e procedeuse ao bloqueo de 7.500 euros nunha das contas utilizadas. As dilixencias practicadas foron postas en coñecemento do xulgado de garda de Cangas do Morrazo.