Axentes da Policía Local de Vigo localizaron a un mozo de 15 anos de idade, que accedera a unha vivenda de forma ilegal, e que resultou estar fuxido dun centro de menores.

Segundo informaron fontes policiais, os feitos ocorreron na madrugada deste xoves, cando o 092 recibiu un aviso para acudir a unha vivenda da Travesía de Numancia, onde dous descoñecidos entraran de forma ilegal.

A Policía desprazouse ao lugar e deu aviso ao propietario do inmoble. Unha vez na zona, os axentes observaron a un mozo e unha moza, aos que indicaron que saísen. A muller, de 21 anos de idade e natural de Gondomar, explicou aos funcionarios que accedera ao interior da vivenda para pasar alí a noite cun amigo. O mozo manifestou nun primeiro momento estar indocumentado, pero os axentes localizaron o seu DNI entre as súas pertenzas.

Así puideron constatar que sobre o menor pesaba unha orde de procura por ausentarse dun centro tutelado, polo que foi trasladado a dependencias policiais. Pola súa banda, o propietario da vivenda presentouse no lugar e expresou que non desexaba presentar denuncia.