As obras de conexión da autovía Tui-A Guarda coa A-55 farán necesario o corte de tráfico en ramais da ligazón con esta última vía a partir deste xoves.
Así o trasladou a Consellería de Infraestruturas e Mobilidade, que detallou que para executar a ligazón do punto quilométrico 30 na autovía A-55 e conectar coa vía de altas prestacións Tui-A Guarda, é necesario construír un novo ramal de incorporación á autovía en sentido Portugal desde a rotonda elevada, na calzada dereita.
Co obxectivo de continuar co avance na execución das obras, garantindo a seguridade dos traballadores e dos usuarios da autovía, procederase ao corte total dos ramais de entrada e saída da calzada dereita da A-55, entre os puntos quilométricos 30+100 e 30+600.
Os traballos desenvolveranse desde este xoves ata o próximo 25 de outubro. Para isto, esta semana cortarase o ramal de incorporación sentido Portugal e a próxima semana pecharase o ramal de entrada á ligazón, sentido Tui-Polígono de Areas.
