Vigo volverá acoller a partir do próximo luns, día 18 de setembro, a reunión anual para fixar as cotas de pesca da Organización de Pesqueiras do Atlántico Noroeste (NAFO, polas súas siglas en inglés). Así, as delegacións internacionais de todas as partes que forman este organismo desprazaranse á cidade olívica nove anos despois do último encontro na urbe, levado a cabo en 2014.

En concreto, esta organización está composta pola Unión Europea e 12 países máis: Canadá, Corea do Sur, Cuba, Dinamarca, Estados Unidos, Francia, Groenlandia, Islandia, Xapón, Noruega, Rusia e Ucraína. No encontro, que se celebrará ata o venres 22, decidiranse as cotas de pesca para o ano que vén de especies de gran importancia para a frota galega, como o bacallau ou o fletán, entre outras.

A reunión en Vigo será o número 45 da historia da organización e levarase a cabo a porta pechada, polo que o venres previsiblemente daranse a coñecer os resultados da mesma. O ano pasado este encontro celebrouse en O Porto (Portugal), onde se anunciou que en 2023 reuniríanse en Santiago de Compostela. Finalmente, a localización escollida foi Vigo.

En 2022, decidiuse permitir para este exercicio un incremento do 52 % no Total Admisible de Capturas (TAC) do bacallau na zona 3M, grazas á mellora da súa situación, con ata 6.100 toneladas, mentres que se mantiveron as posibilidades de pesca de anos anteriores para especies como a gallineta e a raia. No caso do fletán negro, baixou un 5 % o seu TAC.

A delegación española, encabezada pola que era directora xeral de Pesca Sustentable, Isabel Artime, actual secretaria xeral de Pesca, cualificou no seu día os resultados para a actividade da frota española como “moi satisfactorios”. Agora cabe esperar a ver que ocorrerá este ano en Vigo.