Os alumnos do IES A Paralaia de Moaña tiveron un susto na primeira xornada do curso ao chocar o autobús escolar e o coche que conducía un alumno deste centro, no que tamén se imparten ensinos superiores. O condutor do coche resultou ferido e foi atendido no propio punto, aínda que puido saír polo seu propio pé.

A alcaldesa de Moaña, Leticia Santos, confirmou que o sinistro se produciu na intersección da PO-313 e a EP-1104, un punto que, segundo advertiu, é de alta sinistralidade. De feito, recentemente produciuse outro accidente neste mesmo lugar.

O sinistro ocorreu á saída das clases, pasadas as 15.00 horas, cando o autobús e o coche chocaron. Os ocupantes do autobús non sufriron danos e foron recollidos polos seus familiares posteriormente, tras avisar do sucedido.

O condutor do autobús tampouco sufriu danos. Unha vez levantadas as pertinentes actas, o vehículo escolar regresou á cocheira da estación de Pontevedra, mentres que o coche sinistrado foi retirado por un guindastre.

A rexedora de Moaña lamentou que este punto ten “bastante sinistralidade”, polo que instou á Xunta, que ten as competencias sobre esta estrada, a que se avalíen as medidas de mellora peonil que veñen “pedindo”. “Parécenos importante que se avalíe a mellora deste punto”, solicitou.