A conselleira de Economía, Industria e Innovación, María Jesús Lorenzana, animou a visitar a Feira Tradicional dos Remedios de Ponteareas que combina a comercialización de pezas de Artesanía de Galicia coa demostración de oficios tradicionais, a venda de produtos gastronómicos e actividades lúdicas relacionadas coa artesanía e a música.
Segundo informou a Xunta, nesta edición a Feira conta con 18 expositores de Artesanía de Galicia, postos de alimentación e demostracións de oficios tradicionais galegos.
A Fundación Artesanía Galicia colabora nesta edición coa organización de tres talleres de artesanía abertos ao público, gratuítos e sen inscrición previa, que se celebraron entre a xornada do venres e este sábado.
A demostración de oficios e os talleres abertos dirixidos a todo tipo de públicos supoñen unha das vías “máis efectivas” para achegar a artesanía á sociedade e, especialmente, aos máis pequenos.
