A presenza de mosquito tigre no municipio de Redondela foi confirmada, co que xa son catro os concellos galegos, todos da área metropolitana de Vigo, nos que foi documentada a existencia desta especie. A identificación foi posible grazas á colaboración cidadá a través da aplicación ‘Mosquito Alert‘, o que permitiu que os técnicos das universidades de Vigo e Santiago que participan na Rede Galega de Vixilancia de Enfermidades Transmisibles por Vectores (ReGaViVec) confirmasen que se trata dun mosquito ‘aedes albopictus‘.
Deste xeito, Redondela súmase a Moaña, Vigo e Cangas como integrante do comité técnico do mosquito tigre, que se reunirá este xoves por vía telemática, segundo trasladou a Administración autonómica nun comunicado. A Consellería de Sanidade agradece a colaboración veciñal para vixiar a presenza destes insectos, que son vector de enfermidades como o virus do dengue, o chinkungunya ou o Zika.
O Goberno galego aclara que ningún dos especímenes achados ata a data desde que o primeiro fose identificado en Moaña a comezos do mes de agosto era portador dalgún dos virus mencionados. Así as cousas, recomenda “pautas sinxelas” como como eliminar puntos de auga estancada en bebedeiros, pratos baixo macetas, caldeiros á intemperie ou embarcacións co seu simple baleirado ou coa renovación da auga cada 4 ou 5 días.
Ademais, Sanidade habilitou recentemente unha entrada na súa páxina web que recolle o programa de xestión integrada do vector mosquito tigre, cuxa finalidade é evitar ou reducir o impacto, presenza e expansión deste insecto no territorio galego.
