A Facultade de Ciencias Económicas e Empresariais da Universidade de Vigo acollerá o 8 de setembro o acto institucional de apertura de curso académico 2023-24 das universidades galegas, no que estarán presentes, ademais do reitor, Manuel Reigosa, o presidente da Xunta, Alfonso Rueda, e o conselleiro de Cultura, Educación, Formación Profesional e Universidades, Román Rodríguez.
Neste acto solemne, que comezará ás 12.00 horas, a catedrática de Escultura, Yolanda Herranz, será a encargada de impartir a lección inaugural, titulada ‘O autorretrato (do artista): Sombras, Reflexos e Reflexións’. A continuación, intervirán o reitor e o presidente da Xunta, antes de que se clausure a cerimonia coa actuación do Coro Universitario.
A última vez que o campus vigués acolleu o acto de apertura de curso (que se fai de forma rotatoria nas tres universidades galegas) foi en 2022, nun contexto marcado polas restriccines debido á pandemia de Covid-19.
O acto institucional porá fin a unha semana na que a UVigo celebrará, nos seu tres campus, xornadas de benvida dirixidas ao alumnado de novo ingreso, de 10.00 a 14.00 horas. Esta actividade arrincará o martes na Escola de Enxeñaría Forestal de Pontevedra, e ao día seguinte fará unha xornada de benvida no Pavillón Universitario de Ourense; mentres que a benvida en Vigo será o 7 de setembro, no pavillón do campus.
