A CIG denunciou este luns, a través dun comunicado, que a xerencia da área Sanitaria de Vigo deixou cunha médica de menos a PAC de Cangas durante tres días: o venres, o sábado e este luns, festivo na localidade.
Un día despois de que responsables da CIG reunísense coa alcaldesa de Cangas para denunciar a situación de falta de persoal facultativo, o Sergas “tomaba a decisión de continuar coa estratexia de non substitución no período de máxima afluencia de visitantes a Cangas coincidindo coas festas do Cristo”, denuncia o sindicato.
“O Sergas non ten reparos en mentir descaradamente sobre a situación sanitaria de Cangas e toma a decisión de continuar dotando de menos persoal médico ao Morrazo”, sosteñen, tras o que consideran esta decisión “un castigo” cara ao persoal por “denunciar a enorme carga asistencial que padecen”.
A CIG anunciou que pedirá explicacións sobre a situación do Morrazo na mesa sectorial co Sergas e trasladará os datos sobre “a falta reiterada e sistemática de persoal facultativo” á alcaldía de Cangas. “Non se trata de cuestións puntuais nin de situacións de forza a maior, a non substitución de médicos obedece a permisos e vacacións programadas desde hai máis de 5 meses”, engade a CIG.
Os responsables da CIG apuntaron que “á situación de falta de substitución do persoal”, súmaselle “a decisión da xerencia de prescindir do habitual reforzo” que “asumía o incremento de asistencias provocado polo aumento de poboación no verán”. “No que vai de agosto, un terzo dos días a PAC de Cangas estivo atendido por dúas médicas (en ocasións unha soa)“, afirma o sindicato, co consecuente “aumento da carga de traballo” tamén pola época vacacional.
