O campista italiano de 32 anos que resultou ferido grave na madrugada deste xoves ao caer unha rama dunha árbore na súa tenda, nas illas Cíes, permanece ingresado na UCI do Hospital Álvaro Cunqueiro de Vigo, estable “dentro da gravidade”.
Así o confirmou o conselleiro de Sanidade, Julio García Comesaña, en declaracións aos medios antes dunha visita ao centro de saúde de Navia, en Vigo. Segundo sinalou, dos dous afectados que seguían no hospital, o máis, grave, o home, segue con prognóstico reservado, estable “dentro da gravidade”, e expresou o seu desexo de que a súa situación poida mellorar e a evolución sexa positiva.
Con respecto á outra persoa ingresada, unha muller portuguesa, a súa evolución foi favorable e é probable que, en próximas horas, sexa dada de alta. García Comesaña lamentou o “desafortunado” accidente e agradeceu a resposta das persoas que se atopaban no cámping no momento do sinistro, algunhas delas profesionais sanitarios de vacacións, que prestaron a primeira axuda. Así mesmo, puxo en valor a rápida actuación dos servizos de emerxencias.
O accidente ocorreu na madrugada do xoves, cando unha rama de gran tamaño caeu sobre varias tendas de campaña no cámping das Illas Cíes. Como resultado, catro persoas resultaron feridas e trasladas ao hospital.
