Desde o Partido Popular de Ponteareas expresaron este mércores o seu “rotundo rexeitamento” ás “graves acusacións formuladas” polos socialistas locais, nas que se acusa á alcaldesa, Nava Castro, de “prácticas caciquís”. Castro, segundo recollen nun comunicado, quixo deixar claro que “non hai ningún familiar facendo tarefas nin ocupando instalacións municipais”, aínda que, dixo, “cando sexa preciso” contará “para os seus asuntos particulares e persoais con quen queira”.
Pola contra, o PP pediu ao PSOE de Ponteareas que “cuestionen ao seu propio partido” e mencionou cuestións como a reunión co delegado do Goberno de decembro de 2022, na que estivo o que foi candidato nas municipais, Delfín Domínguez, “quen non era ningún cargo”.
A continuación, acusaron aos socialistas de “elucubracións malintencionadas” e de “non saber acatar os resultados electorais”. “Sempre actuamos correctamente e respectamos, como non podía ser menos, que sometan calquera cuestión a criterio da Fiscalía, pero que non engadan comentarios malintencionados nin emponzoñen a práctica política”, finaliza o comunicado.
