A Sala do Civil e Penal do Tribunal Superior de Xustiza (TSXG) confirmou, case na súa totalidade, a sentenza da Audiencia Provincial de Pontevedra que condenou a tres implicados na introdución en España de 30 quilos de cocaína a bordo do pesqueiro ‘New Polar’, que atracou no porto de Cangas o 22 de maio de 2019. O prezo da droga no mercado ilícito, segundo a resolución, superaría os 1,2 millóns.

Con todo, o TSXG rebaixa de oito a seis anos e medio a condena imposta á persoa que recibiría a droga aprehendida, pois estiman que non concorre a agravante de reincidencia. Pero o TSXG mantén a condena relativa ao pago da multa, que ascende a 1.210.829 euros.

Por contra, o alto tribunal galego desestima o recurso presentado contra o fallo de primeira instancia polo cociñeiro, de Cangas do Morrazo, quen foi condenado a catro anos de cárcere e ao pago dunha multa de 600.000 euros.

No seu caso, o tribunal tivo en conta a atenuante de confesión, pois considera probado na sentenza que “a aprehensión da sustancia estupefaciente e a frustración da finalidade da operación de transmisión a terceiros” foi propiciada “pola colaboración desinteresada do propio acusado, quen desde o ano 2014 mantiña unha relación de confidente con axentes da Garda Civil”.

Os maxistrados tamén mantiveron a pena imposta -seis anos de cárcere e o abono de 1.210.829 euros- ao acusado que operaba como ligazón en España dos provedores da cocaína.

ABSOLTOS

No seu momento, a sección segunda da Audiencia Provincial de Pontevedra decidira absolver aos outros tres procesados, ao determinar a invalidez das probas contra eles, xa que se baseaban no envorcado de datos do teléfono do cociñeiro do barco, e non se puido asegurar a cadea de custodia do terminal nin garantir que non fose manipulado.

Precisamente por iso, na súa sentenza a Audiencia Provincal considerara que non quedaba acreditado que os acusados integrasen un grupo criminal, polo que resolveu absolvelos a todos con respecto a este delito.