A Coalición Son vén de presentar unha moción para reivindicar a “defensa da calidade e a independencia dos medios públicos de comunicación audiovisual de Galicia”, tralo que definen como unha “escandalosa manipulación e desmantelamento do servizo público de información por parte do Partido Popular”.
O seu portavoz, Xosé Lois Jácome, apunta a un “incumprimento sistemático da Lei 9/2011, especialmente naqueles aspectos que afondan na independencia e calidade dos medios públicos”; seguindo como director xeral un cargo elixido e nomeado polo PP, “cando debería ter sido elixido por unha ampla maioría de dous terzos no Parlamento” engadiu.
Para o deputado provincial, non son novas as denuncias por parte do persoal da CRTVG. Jácome asegurou que “é algo que vén de lonxe, na CRTVG non puidemos ver a comparecencia en directo de Feijóo cando explotou a súa casual relación de amizade co narcotraficante Marcial Dorado, tampouco puidemos ver máis de 50 segundos no telexornal sobre a sentenza da Gürtel, unha orde expresa da xefa de redacción”.
“A CRTVG está baixo mínimos en canto a produción propia”, advirte o deputado: “A este paso soamente teremos o telexornal e pouco máis”. Jácome tamén reivindicará no pleno azos e apoio expreso a todo o persoal da CRTVG que se atopa coartado na súa liberdade de prensa, e especialmente ós profesionais que veñen de dimitir “en pro duns medios públicos de comunicación plurais e independentes”.
