Un total de seis estudos de arquitectura optan á redacción do proxecto básico e de execución para a construción do novo instituto do barrio vigués de Navia, que suporá un investimento estimado duns 14 millóns de euros.

Tal como informou a Xunta de Galicia, desta maneira o Goberno galego reafirma o seu compromiso de continuar avanzando todos os trámites administrativos para facer realidade, canto antes, esta nova infraestrutura educativa.

Respecto diso, o Executivo autonómico reiterou a necesidade de dispor dos terreos, polo que confía en que o Concello de Vigo axilice a cesión da parcela, tras moitos meses de espera.

“A construción deste instituto, no que a Xunta investiu xa máis de 400.000 euros en trámites previos, é o proxecto máis ambicioso en materia educativa en toda Galicia”, reivindicou nun comunicado, explicando que contará con capacidade para uns 700 alumnos.