Varias ducias de pensionistas concentráronse no serán deste luns na rúa do Príncipe, ante o Museo de Arte Contemporánea (MARCO) para esixir, de novo, unhas “pensións dignas”.

A protesta realizouse no marco da ‘Xornada de loita estatal’ convocada en toda España pola Coordinadora Estatal por la Defensa del Sistema Público de Pensiones.

Baixo o lema “Sempre adiante! Sen loita non haberá hucha”, os pensionistas, congregados baixo o paraugas do Movemento Galego pola Defensa do Sistema Público de Pensións, anunciaron unha serie de actos reivindicativos que terán lugar nos vindeiros días na cidade.

Os pensionistas consideran prioritario que a actualización das prestacións volvan realizarseco IPC real.  Piden blindar esta cuestión na Constitución para que, goberne quen goberne, as pensións e a súa actualización estean aseguradas.

E entre o colectivo, chaman a atención sobre a precaria situación das viúvas, que cobran un 52% menos de pensión.

Hai que recordar, ademais, que as pensións galegas son as segundas máis baixas do Estado, as primeiras no caso das mulleres.

Á par que en Vigo, centos de pensionistas concentráronse por toda Galicia: A Coruña, Lugo, Ferrol, Rianxo, Noia, Ribadeo, Marín, O Porriño e Vilagarcía.