O auditorio de Pazo de Mos mellorará a súa climatización despois de que a consellería de Presidencia, Xustiza e Deportes e a Fundación Pazo de Mos asinasen, este martes, un acordo de colaboración.
A Xunta, a través de comunicado de prensa, explicou que a obra contará cun orzamento de 33.000 euros, financiados polo Goberno autonómico, e deberá estar finalizada antes de que termine o ano. Con esta iniciativa, ambas as entidades colaboran na adecuación e mellora dun espazo que promove a realización de eventos de interese xeral con fins culturais e sociais. Desta maneira, búscase aumentar tanto o confort do persoal como o dos visitantes.
Vicepresidencia Segunda detallou que o ano pasado pasaron por este auditorio máis de 16.000 persoas que participaron nos eventos desenvolvidos no pazo. O edificio sitúase á beira do Camiño Portugués e conta con elementos incluídos no catálogo de patrimonio de Galicia. A súa construción iniciouse a finais do século XVI e é de alto valor para o patrimonio galego.
