O xulgado de instrución número 6 de Vigo abriu dilixencias e citou a declarar como investigadas a unha profesora e tres exalumnas que apuntaron a un profesor da Escola de Arte Dramática de Galicia (ESAD) como presunto autor de acoso sexual, un caso que foi arquivado e non chegou a xuízo. Agora, este profesor presentou denuncia por un suposto delito de denuncia falsa.
O xulgado de instrución, á vista das probas presentadas, sinala que os feitos “fan presumir a posible existencia dun delito de denuncia falsa” imputado a estas catro persoas, ás que cita para declarar como investigadas. As comparecencias produciranse os próximos 19 e 20 de xuño.
En 2020 presentáronse denuncias por parte de varias alumnas contra tres profesores da Escola de Arte Dramática, que está situada en Vigo, por presunto acoso sexual e abuso de poder. Durante o proceso de investigación xudicial, hai un ano e medio, os denuciados foron suspendidos da docencia.
Na Escola celebráronse varios actos de repulsa e colocáronse carteis para censurar os supostos abusos e apoiar ás denunciantes. En maio do ano pasado, a Audiencia arquivou a causa sen que chegase a xuízo, e os profesores reincorporáronse á Escola, aínda que sen dar clase.
Pese ao arquivo, en xuño de 2022, un grupo de profesores/as e alumnos/as concentráronse na ESAD para insistir no seu apoio ás mozas que denunciaran, e para reafirmar a súa posición de que a Escola debe ser un espazo “libre de violencias machistas”.
