O Xulgado do Mercantil número 3 de Pontevedra, con sede en Vigo, estimou integramente a demanda promovida por entidades bancarias contra a empresa Madeiras Igrexas debido ao incumprimento do convenio aprobado en setembro de 2013 dentro do concurso voluntario de acredores, pois incumpriu o calendario de pagos.
Segundo informa o Tribunal Superior de Xustiza de Galicia (TSXG), unha vez firme a resolución, pois contra ela cabe presentar recurso de apelación, procederase á apertura de oficio da fase de liquidación.
Os efectos da declaración xudicial de incumprimento serán os previstos no artigo 404 TRLC, que se producirán desde que a sentenza sexa firme.
A maxistrada do Xulgado do Mercantil número 3 de Pontevedra indica que “as causas que puidesen determinar a falta de pagamento resultan irrelevantes polo que agora interesa, sen prexuízo dos eventuais efectos que puidese determinar na sección de cualificación”.
Ademais, sinala que, neste caso, “non consta que a parte demandada promovese, en tempo e forma, unha proposta de modificación de convenio, ante os seus reiterados incumprimentos, con carácter previo á solicitude de incumprimento“, nin que acreditase “o cumprimento do plan de pagos nos termos fixados no convenio”.
