A agrupación socialista de Vigo ratificará na tarde deste martes, se non hai sorpresas, a candidatura que encabeza Abel Caballero para as próximas eleccións municipais de maio, na que o actual rexedor e aspirante á reelección recupera á deputada Olga Alonso (que xa pasou pola Corporación como concelleira de Educación).
Caballero desvelou este martes, a través dunhas declaracións remitidas aos medios, outros nove nomes de candidatos que lle acompañarán na lista, e que se suman aos 12 xa coñecidos: ademais do propio alcalde, Carmela Silva (no posto 2), Elena Espinosa (3), María José Caride (4), Javier Pardo (5), Ana Mejías (6), Yolanda Aguiar (7), Olga Alonso (8), Abel Losada (9), Ángel Rivas (10), Patricia Rodríguez (11), e Carlos López Font (12).
A candidatura complétase, nos seguintes postos, coa actual concelleira de Medio Ambiente, Nuria Rodríguez; o concelleiro de Facenda, Jaime Aneiros; o concelleiro de Deportes, Manel Fernández; o concelleiro de Festas e Participación Cidadá, Pablo Estévez; a concelleira de Turismo, María del Carmen Lago; o concelleiro de Educación, Gorka Gómez; a concelleira Ana Laura Iglesias; a edila de Igualdade e Normalización Lingüística, Uxía Blanco; e unha nova incorporación, a empresaria Patricia Iglesias.
Abel Caballero volveu a eloxiar a valía dos integrantes da súa lista electoral e lanzou un “reto”: “Que alguén busque en toda Europa unha lista deste potencial político e de xestión“, proclamou, e lembrou que na súa candidatura hai “dúas exministras, unha exconselleira, unha presidenta da Deputación que foi portavoz no Senado, xente do mundo da Universidade, funcionarios de altísimo nivel, xente da avogacía, da Educación ou do mundo sindical”. “É unha lista excepcional”, repetiu.
Cos nomes da candidatura coñecidos ata agora (faltan por desvelarse os seis que completan a lista) confírmase que repiten os membros do ‘nucleo duro’ de Caballero e os seus concelleiros actuais, fóra de Santos Héctor Rodríguez, que non está entre eses 21 candidatos confirmados.
