Un home, F.I.A. de Vigo e 49 anos de idade, foi detido o pasado venres na cidade olívica tras supostamente agredir á súa muller e perseguila en coche cando ela trataba de escapar da pelexa.

Tal como informou a Policía Local, os feitos ocorreron sobre as 22,30 horas, cando unha patrulla que se atopaba na confluencia da Avenida do Aeroporto con rúa Aragón e observou como dous vehículos circulaban por unha das rotondas en sentido contrario, decatándose de que un dos turismos perseguía ao outro.

Por iso, procederon a interceptalos, sendo unha das condutoras a suposta vítima, que manifestou discutir co seu marido no domicilio que compartían, cando el a comezou a insultar, mostrouse violento e suxeitouna polo pescozo. Aí, ela decidiu abandonar a vivenda acompañada dos seus dous fillos menores, tratando o home de interporse na traxectoria do vehículo e iniciándose unha persecución.

Pola súa banda, o home recoñeceu a discusión pero non a agresión. Tras iso, foi detido pola suposta comisión dun delito de violencia de xénero.