Case 60.000 hectáreas arderon dunha tallada durante a semana do 17 de outubro de 2018. Un caos incendiario que provocou catro mortos e numerosos danos materiais. Desa traxedia, da que se vai facer un ano, non se coñecen aínda as causas, nin os autores.  E, agora, o ditame dunha Comisión de Investigación aprobada no Parlamento galego acaba de ser aprobada cos votos a favor de PPdeG e PSdeG e o voto en contra de En Marea e o BNG.

Populares e socialistas destacan que este órgano parlamentario axudou a que se activen novos mecanismos e protocolos para evitar un desastre semellante, e tamén que haxa máis medios. Pero En Marea e BNG critican que non se teña entrado no fondo da cuestión.

Estas formacións oinciden en que faltan elementos chave no texto como poñer couto ao eucalipto, remodelar o sistema de extinción cunha aposta pola homoxeneización e contra a precarización, así como apostar polas Unidades de Xestión Forestal ( Uxfor), entre outras. Tamén que non se teña feito mención a responsabilidades políticas.

RECOMENDACIÓNS

Desta comisión saen máis dun centenar de recomendacións como a posta en marcha dun ente instrumental específico –dependente da Xunta– que coordine a todas as administracións en materia de prevención de incendios e vixilancia de incumprimentos, con asesoramento estable aos concellos.

Ademais, recoméndase a creación dun grupo de expertos –elixidos polos grupos parlamentarios– que antes do período de alto risco de 2019 estableza melloras para o servizo de extinción. Para a investigación chámase a progresar na coordinación entre corpos e o uso de novas tecnoloxías.

Tamén se propón determinar que parcelas están abandonadas en Galicia, mentres para a mellora das franxas de seguridade potenciarase que nestes espazos se desenvolvan actividades agrarias ademais de rozas.

Entre estas máis de 100 medidas, se aposta por: unha ordenación integral do territorio, potenciar as competencias da Axencia Galega de Desenvolvemento Rural, a multifuncionalidade do monte, a gandería en extensivo, a inclusión obrigatoria de frondosas autóctonas nas plantacións produtivas e incentivos fiscais no rural. Todo iso nun texto no que se identifican problemas estruturais como o abandono, a estrutura do territorio e a súa ordenación, así como o cambio climático.