A Fundación Provincial Banco de Alimentos de Vigo contabilizou uns 50.000 quilos de comida recadados durante o Zampakilos Solidario, unha cifra “marca” conseguida nesta campaña impulsada pola cadea Vegalsa-Eroski.

En concreto, recolléronse máis de 47.000 quilos nos 34 supermercados da provincia con presenza de voluntarios, aos que se suman tamén máis de 4.000 euros a través de achegas económicas ao pasar por caixa e que se converten tamén en produtos de primeira necesidade.

O Banco de Alimentos explicou que nesta ocasión a recollida volveu levar a cabo de forma mixta, xa que as persoas podían realizar achegas económicas ou alimentos físicos.

Só en Vigo e a súa área de influencia, incluíndo Redondela, O Porriño, Baiona, Nigrán e A Guarda, recibíronse máis de 33.000 quilos, mentres que en Pontevedra uns 12.500 quilos.

“Desde a ONG valoramos enormemente o esforzo e a empatía demostrada polos clientes do grupo empresarial galego, sobre todo nun contexto tan complicado como o actual cos prezos dos alimentos disparados. Durante 2022, o Zampakilos Solidario traduciuse en 30.000 quilos de alimentos e, agora, esa cifra incrementouse en case o dobre”, indicou a Fundación nun comunicado.