A Policía Local de Ponteareas identificou a dúas persoas como supostas autoras de varias pintadas en edificios e bens municipais desta localidade, entre eles, a Casa Consistorial, catalogada por Patrimonio.
Segundo informaron fontes do Concello, todas as pintadas (na Casa Consistorial, o auditorio municipal ou a biblioteca) “recollen as mesmas expresións” contra o goberno local.
O Concello emprenderá accións legais “polos danos ocasionados de forma dolosa nos bens do patrimonio histórico-artístico”, que implican penas de multa e prisión, en función dos estragos causados. Así mesmo, o goberno fará unha valoración do custo de limpar todas as pintadas “para reclamar o importe ás persoas autoras”.
O executivo local sinalou que “todas as críticas son lexítimas” pero “a liberdade de expresión non ampara actos de vandalismo nin danos aos bens públicos”, algo que acaba repercutindo en todos os veciños, que cos seus impostos deben pagar esa “falta de civismo”.
